തേക്കടി: തിരുവനന്തപുരം ജഗതിയിലെ ഗവ: ബധിര വിദ്യാലയത്തിലെ വിദ്യാർത്ഥികൾക്കായി പെരിയാർ കടുവാ സങ്കേതത്തിൽ സംഘടിപ്പിച്ച മൂന്നുദിവസത്തെ നേച്ചർ ക്യാമ്പ് സമാപിച്ചു. 22 അംഗങ്ങൾ പങ്കെടുത്ത ക്യാമ്പ്, പ്രകൃതി പഠനത്തിനും അനുഭവങ്ങൾക്കുമായി വ്യത്യസ്തമായൊരു വേദിയൊരുക്കി.
പെരിയാർ ടൈഗർ റിസർവ് അസിസ്റ്റന്റ് ഫീൽഡ് ഡയറക്ടർ ആർ. ലക്ഷ്മി ക്യാമ്പ് ഉദ്ഘാടനം ചെയ്തു. വിദ്യാർത്ഥികളിൽ പരിസ്ഥിതി അവബോധം വളർത്തുന്നതിനും വനത്തെക്കുറിച്ച് ആഴത്തിലുള്ള അറിവ് പകരുന്നതിനുമുള്ള വിവിധ പരിപാടികൾ ക്യാമ്പിന്റെ ഭാഗമായി ഒരുക്കിയിരുന്നു.
.jpeg)
റിസർച്ച് റേഞ്ച് ഓഫീസർ എം. മനോജ്, വൈൽഡ് ലൈഫ് അസിസ്റ്റന്റ് ലിവിൻ രാജ്, ബയോളജിസ്റ്റ് രമേഷ് ബാബു എന്നിവർ വനത്തിലെ ജൈവവൈവിധ്യത്തെക്കുറിച്ചും വന്യജീവികളെക്കുറിച്ചും അംഗങ്ങൾക്ക് അവബോധം നൽകി. വിദഗ്ധർ നയിച്ച ഈ ക്ലാസുകൾ വനത്തിന്റെ പ്രാധാന്യം മനസ്സിലാക്കാൻ സഹായകമായി.
വനത്തിലെ ട്രക്കിംഗും പെരിയാർ തടാകത്തിലെ ബോട്ടിംഗും പ്രകൃതിയെ തൊട്ടറിയാൻ അവസരമൊരുക്കി. ഇതിനുപുറമെ, പരിസ്ഥിതിയുമായി ബന്ധപ്പെട്ട ഡോക്യുമെന്ററികൾ പ്രദർശിപ്പിച്ചത് പുതിയ അറിവുകൾ പകർന്നു നൽകി. മൂന്ന് ദിവസം നീണ്ടുനിന്ന ക്യാമ്പ് പ്രകൃതിയുമായുള്ള സമ്പർക്കത്തിലൂടെയും പഠനത്തിലൂടെയും പങ്കെടുത്തവർക്ക് മികച്ച അനുഭവമാണ് സമ്മാനിച്ചത്.
