പട്ടികജാതി-പട്ടികവർഗ്ഗ വികസന കോർപ്പറേഷന്റെയും കുടുംബശ്രീയുടെയും സംയുക്ത ആഭിമുഖ്യത്തിൽ, പട്ടികജാതി-പട്ടികവർഗ്ഗ വിഭാഗത്തിൽപ്പെട്ട വനിതകൾക്ക് നൽകുന്ന പലിശരഹിത വായ്പയുടെ മുന്നോടിയായി ബോധവൽക്കരണ സെമിനാർ സംഘടിപ്പിച്ചു.
പഞ്ചായത്ത് കമ്മ്യൂണിറ്റി ഹാളിൽ വെച്ച് നടന്ന സെമിനാർ ഉപ്പുതറ പഞ്ചായത്ത് പ്രസിഡന്റ് ഷീല രാജൻ ഉദ്ഘാടനം ചെയ്തു. കുടുംബശ്രീ ചെയർപേഴ്സൺ ബിന്ദു സജീവ് ചടങ്ങിൽ അധ്യക്ഷത വഹിച്ചു.
പട്ടികജാതി-പട്ടികവർഗ്ഗ വികസന കോർപ്പറേഷൻ ജില്ലാ മാനേജർ സിജു തങ്കപ്പൻ, മാനേജ്‌മെന്റ് ട്രെയിനി അമൽ മോഹൻ, കമ്മ്യൂണിറ്റി കൗൺസിലർ സുഗന്ധി എന്നിവർ ക്ലാസുകൾക്ക് നേതൃത്വം നൽകി.
പട്ടികജാതി-പട്ടികവർഗ്ഗ വനിതകളുടെ സാമൂഹികവും സാമ്പത്തികവുമായ ഉന്നമനം ലക്ഷ്യമിട്ടാണ് ഈ വായ്പാ പദ്ധതി നടപ്പിലാക്കുന്നത്. വനിതകളുടെ വരുമാനം വർദ്ധിപ്പിക്കുക, സമ്പാദ്യശീലം വളർത്തുക, ജീവിതോപാധികൾ മെച്ചപ്പെടുത്തുക, സി.ഡി.എസ്. പ്രവർത്തനം കൂടുതൽ ശക്തിപ്പെടുത്തുക എന്നിവയാണ് പലിശരഹിത വായ്പ നൽകുന്നതിലൂടെ ഉദ്ദേശിക്കുന്നത്.
18 മുതൽ 60 വയസ്സുവരെ പ്രായമുള്ളവർക്ക് 1 ലക്ഷം രൂപ മുതൽ 1,30,000 രൂപ വരെയാണ് വായ്പയായി ലഭിക്കുന്നത്. 3 മുതൽ 4 വർഷം വരെയാണ് തിരിച്ചടവ് കാലാവധി.
സി.ഡി.എസ്. വൈസ് ചെയർപേഴ്സൺ സരസ്വതി കോൾസൺ, സി.ഡി.എസ്. അംഗങ്ങളായ ജബക്കനി, സുമതി രാജു, രജനി പത്മനാഭൻ, ഉഷാദേവി എന്നിവർ സംസാരിച്ചു.
